17 February 2011
Masayang ipinagdiwang noong ika-13 ng Pebrero, bisperas ng Araw ng mga Puso, ang Camp Pag-ibig ang taunang “day camp” na ginaganap sa Balara Filters sa Quezon City para sa mga batang may espesyal na pangangailangan.
Nagkataon lang siguro na National Intellectual Disability Week din (Feb.12-18), pero ang tunay na dahilan kung bakit ang day camp na ito’y binansagan na Camp Pag-ibig ay sapagkat ito ay isinasagawa tuwing Valentine’s Day o sa weekend na pinakamalapit sa Araw ng mga Puso. Dahil dito, itinuring ito ng mga organizer na isang “Love Fest” o pag-aalay at pagpapamalas ng pagmamahal para sa mga batang may kapansanan at may espesyal na pangangailangan.
Ang mga special kids ng Camp Pag-ibig ay mula sa iba’t ibang SPED o Special Education schools ng National Capital Region. Ayon kay Dr. Erlinda Lolarga, pangulo ng Philippine Association for the Retarded (PAR), iilan-ilan lang ang tagasuporta ng Camp Pag-ibig nang ito’y inilunsad noong 1976.
Ngunit sa tulong at suporta ng QC government, DepEd Bureau of Elementary Education, QC Capitol Jaycees at Manila Water, lalong gumanda, lalong sumaya at lalong naging mas makabuluhan ang espesyal na araw na ito para sa mahigit 2,500 na batang may hearing at visual impairment, autism at iba pang mga kakaibang pangangailangan.
